最近我都沉迷睇奧運......其實我都有個奧運夢.....
我記得想當年，小學都有體操班招募，然後我同呀媽講，好想參加平衡木訓練，呀媽話：「屋企咁細，去邊到練？日日出街練呀？喺你張床上面跳呀？屋企張床轉身訓都唔夠位」。咁其實係，麥兜練搶包山都只可以靠個組合櫃，你練平衡木，唔好講有無位，你樓底都無咁高來練。
而家諗返起.....香港真係唔容許你發奧運夢......
● 我試過借同學張跳舞毯返來跳「艾以艾以也，I'm your little butterfly」，九秒九就俾樓下投訴。
● 又試過係屋企走廊跳繩，又俾隔離屋勸喻你「唔好喺條走廊玩，返入屋」。
● 甚至落公園諗住fing 吓韆鞦，郁吓伸展吓，都因為太多細路，俾呀媽叫我「每人fing 5分鐘，俾其他人fing」
無論你公共，定私人場所，香港真係連「轉身射個3分波」嘅空間都無。
※※※※※※
今日見到CNN 講香港有對couple買咗個300呎嘅單位，運用科技設計增加空間.....其實同宜家傢私個「宜室宜居」意念差唔多.....
最多人like 嘅留言，係一個外國人講「 I'd be exhausted having to undo and redo the furniture......」。佢真係好精明，我而家日日訓之前，將床上面啲嘢搬去電腦櫈上面，我都見支力。你要我每用一件傢私都重新組裝同擺返原位，我會好抑鬱。
有一個外國人留言話，如其要哂錢design 到間屋咁，點解唔用請designer 啲錢，買間大啲嘅屋？有時真係覺得，香港人嘅苦，只有香港人懂得。
A Hong Kong couple's wish-list for a home was ambitious, given the size of their 309-square-foot apartment. But they pulled it off, thanks to a knack for innovative design. http://cnn.it/2aYzxwE
Search